Napamatod-an nga walay gipili nga bolok sa politika ang pagpanghatag ug ayuda ni Governor Rosalina “Nanay Nene” Jalosjos sa gipahigayon nga Gugma Ayuda Medical and Dental Outreach program didto sa Barangay Sipacong sakop sa lungsod sa Leon B. Postigo probinsya sa Zamboanga del Norte kagahapong adlawa.
Si Avelino Arguiles, 62 anyos ug residente sa Barangay Tinuyop, Leon B. Postigo ang nipaabot sa iyang pagpasalamat sa gihatag nga lima ka kilong commercial rice nga gikan sa kagamhanang probinsyal.
Pinaagi niini, nasukod kung unsa kamatinod-anon ang paghatod ug serbisyo ni Governor Jalosjos sa mga katawhan bisan pa ug klaro kaayo nga nagsul-ob ug T-shirt nga color pula ug giprintahan ug “Jesus is my savior/ Berto Uy PDP Laban” nga kaatbang sa politika.
Wala kini igsapayan sa gobernador ug ang nahisgotan nakabitbit ug bugas sa iyang pagpauli.
Dunay nakapangutana, nga kung sa kaatbang pa ni Governor Jalosjos nahitabo ang susamang scenario, makadala kaha ug bugas ang magsoot ug t-shirt nga giprintahan ug dagway o kaha pangalan ni Governor Jalosjos?
Gipangunahan ni Provincial Administrator Wilberth “Jojo” Magallanes, Atty. Ivan Patrick Ang, over all chairman sa ayuda ug mga personahe sa Provincial Social Welfare and Development Office (PSWDO) pinaagi ni Jervis Jalosjos ang paghatod sa tanang serbisyo sa capitolyo.
Adunay gipahigayon nga serbisyo medical, agrikultura, legal ug ingon man ang pagpanghatag ug ayuda nga tag-lima ka kilong commercial rice.
Angay masayran nga ang Barangay Sipacong anaa sa hilit nga lugar sa Leon B. Postigo ug nag-una ang taga engineering office ayha ang ayuda aron ayuhon ang ilang dalan nga nabiyaan sa nakalabay’ng administrasyon sa probinsya.
(Source: Provincial Information Center ZaNorte Facebook page)