Masadyaon nga mipadayag sa iyang mga mensahe si Governor Rosalina “Nanay Nene” Jalosjos atol sa iyang State of the Children’s Address (SOCA) diin nagmalampuson nga gitambungan sa mga estudyante sa Jose Rizal Memorial State University (JRMSU), mga nagkalain-laing mga opisyales, magtutudlo, nagkalain-laing buhatan sa ahensiya, kapulisan, ug uban pang sector, ug mga media practitioners, Nobyembre 27,2024.
Mapasalamaton ug dako ang Gobernadora sa mga mitambong sa iyang SOCA diin dako niyang kalipay nga ipaabot sa tanang misaksi ingun man ang pagpadayag sa mga nagkadaiyang kalampusan nga nabuhat sulod sa iyang termino nga dakong tabang alang sa sector sa kabataan nga makahatag kanila ug dugang panginahanglan ilabi na sa health sector lakip na ang mga kaayuhan alang sa katawhan.
Matud pa sa Gobernadora nga sa iyang pagtapos sa termino siya mismo masigarbuhon nga nakalampos alang sa tiunay nga pagpangserbisyo sa katawhan ilabi na sa mga kabataan sa probinsya, sibo sa iyang panultihon nga Misyon ko tinuod nga Serbisyo.
Dugang pa sa Gobernadora nga ang iyang pagpangserbisyo dili para sa iyang kaugalingon, kini naglakip sa pagtabang sa mga nagka-lainlaing sector sa probinsya, ilabi na ang mga kabatan-onan nga maoy sumusunod natong tanan kansa nagdala sa paglaom sa probinsya sa umaabot nga panahon.
Kahibaloan nga ang iyang pagpangserbisyo dili ni para sa pipila lamang, gumikan ang iyang misyon seryoso nga walay bulok sa pulitika ingon man walay pagpili kung sikinsa ang mahimong tabangan nga puno kini sa paghigugma alang sa tanang katawhan sa tibuok Probinsya sa Zamboanga del Norte. (Angelica T. Obina)