Gipahigayon sa mga personahe sa Sindangan Central Fire Station nga gipangulohan ni FSINSP Francis Carl T. Paulite ang Fire Drill ug Fire Safety Lecture sa Paglaum Multi-Purpose Cooperative sa Sindangan aron mapalig-on ang kahibalo ug kahandam sa publiko batok sunog.
Gisugdan ang kalihokan pinaagi sa Fire Safety Lecture diin gihisgutan ang kasagarang hinungdan sa sunog sa mga establisyemento, hustong housekeeping, kaluwasan sa elektrisidad, ug ang importansya sa functional nga fire protection equipment. Gitun-an usab sa mga empleyado ang hustong paggamit sa fire extinguisher gamit ang T-PASS technique, lakip na ang sakto nga evacuation procedure ug pagpabiling kalmado panahon sa emerhensya.
Gisundan kini sa full-scale Fire Drill simulation diin gisulayan ang emergency response plan sa establisyemento. Sa pagtingog sa alarm, organisado nga mi-evacuate ang mga empleyado padulong sa assembly area samtang gibantayan sa Shift B personnel ang daloy sa evacuation, response time, ug accountability aron masiguro ang pagsunod sa safety protocols.
Giapil usab sa kalihokan ang hands-on demonstration sa basic firefighting ug koordinasyon panahon sa emerhensya, nga nakapalig-on sa panag-uban sa Bureau of Fire Protection ug sa Paglaum MPC. Pinaagi sa padayon nga pagbansay ug edukasyon, nagpabiling determinado ang BFP Sindangan sa pagpanalipod sa kinabuhi, kabtangan, ug kalikupan pinaagi sa pag-andam sa komunidad batok sunog.(JENIFFER JR. DELICA)
Source: BFPR9 Sindangan Fire Station V2