Nagpahigayon ang Commission on Audit (COA) Local Government Audit Sector-A, Team Region IX, uban sa Probinsyal nga Pangagamhanan ug Entrance Conference Calendar Year (CY) 2025, sa Plenary Hall, Zamboanga del Norte Convention and Exhibition Center.
Gipangulohan ni Audit Team Leader Ms. Katherine E. Ortega ang presentasyon sa audit framework ug proseso alang sa CY 2025 Audit Engagement. Si Supervising Auditor Atty. Katrina Q. Acana, midugang sa diskusyon kabahin sa husto ug transparent nga pagdumala sa pondo sa probinsya.
Pormal usab nga gipaila sa COA Team ang Terms of Audit, nga naglakip sa mga thrust areas sama sa fund transfers gikan sa national government, 20% development fund, 5% LDRRMF, Gender and Development (GAD), Local Government Special Fund, ug mga programa ubos sa NTF-ELCA.
Mitambong ang mga hepe sa nagkalain-laing buhatan sa Kapitolyo, lakip si Acting Provincial Administrator Charmie A. Yu. Si Gobernador Darel Dexter T. Uy mipasiugda usab sa kahinungdanon sa limpyo, accountable, ug transparent nga pagdumala sa kwarta sa katawhan.
Gipadayag sa COA nga ang klaro nga paglatid sa audit process makatabang sa pagpalig-on sa transparency ug accountability sa probinsyal nga administrasyon. Natapos ang kalihokan pinaagi sa pagpaambit sa commitment statements ug pahibalo nga ang COA Regional Office IX mopadala ug Feedback Sheet human matapos ang audit aron mapalambo pa ang kalidad sa ilang serbisyo sa sunod nga mga tuig.(IKEN B. GULLEM)
Source: Zamboanga del Norte Provincial News Network