Gipahigayonan og Lektura sa mga personahe sa Dapitan City Police Station ang dul-an sa Tres Mil ka mga estudyante sa Jose Rizal Memorial State University (JRMSU), nga mipailawom sa National Service Training Program (NSTP), didto mismo sulod sa nasangpit nga unibersidad, niadtong nakalabay’ng adlaw, Setyembre 12, 2025 sa may alas 9:00 ang takna sa buntag.
Ang naasoy nga pagpahigayon og Lektura, gipangunahan ni Pmsg. Vanessa A Dofitas, ubos sa Superbisyon ni Pltcol. Eva Joy E Capurcos, ang Officer-In-Charge sa Dapitan City Police Station (DCPS), diin ang nahisgutang Lektura, kabahin sa RA 11313, (Safe Spaces Act / Anti-Bastos Law), samtang ang kabahin sa RA 9262, (Anti-Violence Against Women and Their Children Act) gipasabot pinaagi ni Pssg. Kehshena Moreen R. Ibno, ang WCPD PNCO sa Dapitan Pnp, maingon man, ang kabahin usab sa RA 9165 (Comprehensive Dangerous Drugs Act of 2002), gipasabot, pinaagi ni Pssg. Manuel A. Projo III.
Nasayran nga ang insaktong ihap sa mga gipahigayonan sa maong Lektura, mikabat ngadto sa 2,700.00 ka mga estudyante, nga gilangkuban sa Naval ug Army ROTC, maingon man ang sa CWTS, ug LTS, nga parehong mipailawom sa National Service Training Program (NSTP), diin ang nasangpit nga mga magtutungha, aktibong mipartesipar, sa mga pagpasabot sa mga kapulisan ngadto kanila, kabahin sa nahisgutang mga balaod ning atong nasud nga Pilipinas.
Dugang pa niini, ang maong inisyatiba bahin sa ilang padayon nga pagpakig-uban sa komunidad ug mga paningkamot sa pag-apod-apod sa impormasyon sa Dapitan CPS aron edukaron ang mga kabatan-onan ug mapalig-on ang ilang kahibalo ug responsibilidad sa pag-protiktar sa mga katawhan ning atong nasud.(Julius Esmade)