Duha ka bag-ong service vehicles ang nadawat sa Department of Agrarian Reform (DAR) Zamboanga del Norte aron mapalig-on ang paghatod sa mga programa ug serbisyo ngadto sa mga agrarian reform beneficiaries, ilabina sa mga hilit ug lisod maabot nga mga komunidad sa probinsya.
Ang maong mga sakyanan gipadala sa DAR Central Office pinaagi sa suporta ni DAR Secretary Conrado M. Estrella III, isip kabahin sa paningkamot sa ahensya nga mapalambo ang operasyon sa mga provincial office ug mas mapaspasan ang paghatag og serbisyo sa mga mag-uuma.
Ubos sa pagpanguna ni Provincial Agrarian Reform Program Officer (PARPO) II Daisy Dell Suan Digamon, gidawat ang duha ka bag-ong unit sa DAR Zamboanga del Norte compound. Gipanalanginan usab kini dayon human sa ilang pag-abot gikan sa Manila isip pagpangamuyo alang sa luwas nga pagbiyahe ug malampusong pagserbisyo sa komunidad.
Gilauman sa DAR nga pinaagi sa mga bag-ong service vehicles, mas dali na nilang maabot ang mga agrarian reform beneficiaries, mapalig-on ang pagmonitor sa mga proyekto, ug mas mapadali ang pagpatuman sa mga programa sa agrarian reform sa tibuok Zamboanga del Norte.(IKEN B. GULLEM)
Source: DAR Zamboanga del Norte Province