Nadawat na sa City Government of Dapitan ang usa ka dakong pahinumdom sa pag-atiman sa katawhan human opisyal nga miabot ang duha ka bag-ong Quick Response Vehicles (QRV) sa syudad, nga gilauman nga makapadali ug makapalig-on sa pagresponde sa mga emerhensiya sa lain-laing barangay.
Ang maong mga sakyanan, lakip ang usa ka Toyota Tamaraw Utility Van, gibendisyunan kaniadtong milabay nga adlaw ug andam na dayong gamiton alang sa rescue operations, medical emergencies, ug disaster response.
Pinaagi sa pundo sa lokal nga kagamhanan ubos sa liderato ni Mayor Evelyn “Belen” T. Uy, gipakita sa LGU ang ilang padayon nga paningkamot sa paghatag og mas maayong serbisyo sa komunidad.
Gitambongan ang blessing ceremony sa daghang lokal ug probinsyal nga lider lakip sila Governor Darel Dexter Uy, Mayor Belen Uy, Dipolog City Mayor Berto Uy, mga miyembro sa Sangguniang Panlungsod, ug OIC City Administrator Danilo S. Areños Jr.
Para sa katawhan sa Dapitan, ang bag-ong QRV dili lamang sakyanan kundili simbolo sa pag-andam ug pag-atiman—usa ka saad nga sa oras sa panginahanglan, adunay moabot nga tabang, ug moabot kini sa hustong oras.(IKEN B. GULLEM)
Source: City Government of Dapitan