Nagpasigarbo sa lungsod sa Polanco ang duha ka atleta human makadaog og upat ka medalya sa Palarong Pambansa 2026, lakip ang usa ka bulawan, usa ka pilak ug duha ka tumbaga sa ilang tagsa-tagsang mga event.
Nanguna si Jerome L. Paeste pinaagi sa pag-angkon sa bulawang medalya sa Shot Put (VI T12), pilak sa Long Jump (VI T12), ug tumbagang medalya sa 100-Meter Dash (VI T12). Samtang si Jerald L. Paeste nakadugang usab og dungog sa lungsod pinaagi sa pagdaog og tumbagang medalya sa Shot Put (VI T13).
Isip pag-ila sa ilang kalampusan, personal nga gihatagan og cash incentive sa lokal nga panggamhanan ang duha ka medalista isip pasalamat sa ilang dedikasyon ug sakripisyo sa pagrepresentar sa Polanco sa nasudnong kompetisyon.
Gipasalamatan usab sa LGU Polanco ang mga atleta sa pagdala og dungog sa lungsod ug gipasaligan nga magpadayon ang suporta sa pagpalambo sa lokal nga sports ug sa mga atletang nagrepresentar sa komunidad sa mas dagkong kompetisyon.(JENIFFER JR. DELICA)
Source: Mayor Ying Uy