Pagasugdan na usab karong adlawa, Agosto 11 ang KADIWA ng Pangulo didto sa Eco-Park, Barangay Turno, Dipolog City, nga maghatag og higayon sa mga residente nga makapalit og presko, dekalidad ug mas barato nga mga produkto.
Magpadayon ang KADIWA sulod sa duha ka adlaw, gikan Agosto 11–12, gikan alas 8:00 sa buntag hangtod alas 3:00 sa hapon, diin nagtigom ang nagkalain-laing lokal nga prodyuser ug mga mag-uuma aron direktang ibaligya ang ilang mga produkto ngadto sa mga konsumidor.
Lakip sa mga produkto nga anaa sa KADIWA ang P20 kada kilo nga bugas, preskong prutas ug utanon, mga produktong pangisda, agricultural products, ug uban pang lokal nga pagkaon ug produkto.
Pinaagi sa direktang pagbaligya sa mga produkto, gilauman nga mas makabenepisyo ang mga konsumidor tungod sa mas barato nga presyo, samtang matabangan usab ang mga mag-uuma, mangingisda ug lokal nga prodyuser nga mapalapad ang ilang merkado.
Ang KADIWA ng Pangulo usa usab ka paagi aron mapalig-on ang koneksyon tali sa mga prodyuser ug konsumidor, ilabina pinaagi sa paghatag og mas direktang merkado alang sa lokal nga mga produkto.
Giawhag ang mga residente sa Dipolog City ug mga kasikbit nga lugar nga moduaw sa KADIWA ug suportahan ang mga lokal nga produkto. Gidasig usab ang publiko nga magdala og kaugalingong bayong o eco-bag aron makatampo sa pagkunhod sa paggamit sa plastik ug pagmintinar sa kalimpyo sa lugar.(IKEN B. GULLEM)
Source: Zamboanga del Norte Provincial News Network