Gi anunsyo sa Zamboanga del Norte Electric Cooperative, Inc.(ZANECO) niadtong Enero 20, 2026, didto sa ZANECO- MCO Building, ang pinaka bag-ong power rate update alang sa bulan nga Enero ning kasamtangang tuig para sa mga konsumante og kuryente sa Zamboanga del Norte.
Adunay pagsaka nga 0.0371 pesos matag kilowatt- hour(kWh) ang masinati sa matag konsumante. Ang gamayng pagtaas sa balayrunon subay sa gipasikad nga Green Energy Auction Allowance(GEA-All) nga proyekto sa gobyerno nga gi aprobahan sa Energy Regulatory Commission niadtong Disyembre 13, 2025.
Gilunsad matud pa sa gobyerno ang Green Energy Auction Allowance (GEA-All) arun mapatuman ang malimpyo, malungtaron, og lig-on nga suplay sa enerhiya nga nagtumong sa pagtabang sa katawhan nga makahatag ug mas hapsay nga kaugmaon og sa mosunod nga henerasyon.
Ang maong kausaban, matod pa ni Karen P. Ajias, Power Trading Supervisor sa ZANECO, nagsugod na niadtong Enero 18, og makita kini satung electricity bill nga may lebel nga “GEA-All (Renewable). ”
Gihingusgan sa ZANECO atol sa Press Conference nga usa lamang sila ka collecting agent
ug wala matod silay bahin bisag gamay sa maong dugang pagtaas sa kuryente. Ang tanang bayad nga makuha gikan sa GEA-All isumite ngadto sa National Transmission Corporation (TransCo).
Giawhag usab ang tanan nga mosabot sa maong lakang, suportahan ang maong proyekto, og ipatuman ang responsableng pag gamit sa kuryente.
News and photo by: JENIFFER JR. DELICA