Mibisita kang Rizal Mayor Marissa D. Manigsaca ang mga opisyal sa Department of Trade and Industry aron hisgutan ang umaabot nga upat ka adlaw nga capability training alang sa mga miyembro sa BAROG.
Gipangulohan ang courtesy visit nila Daisy Mae Tambolero, TIDS ug Shared Service Facility Supervisor, Jerry Muit, Shared Service Facility Coordinator, ug Robert Dagpin, Business Counselor. Gipunting sa panaghinabi ang pagbansay sa engineered bamboo production ug processing aron mapalambo ang kahibalo ug kahanas sa mga partisipante.
Sumala sa DTI, tumong sa maong pagbansay ang pagpalig-on sa panginabuhian pinaagi sa pagpalambo sa industriya sa kawayan isip usa ka malungtarong tinubdan sa kita ug oportunidad sa komunidad.
Padayon usab nga gipalig-on sa Department of Trade and Industry ug Local Government Unit sa Rizal ang ilang panagtambayayong aron mapalambo ang panginabuhian, masuportahan ang lokal nga negosyo, ug mapadasig ang pagtubo sa ekonomiya sa lungsod.(JENIFFER JR. DELICA)
Source: Municipality of Rizal