Gikumpirmar sa Department of Social Welfare and Development (DSWD) ang malampusong pagpaluntad sa mga proyekto sa panginabuhian ubos sa Enhanced Support Services Intervention (ESSI), human sa gihimong spot-check sa mga lungsod sa Piñan, Polanco, Dipolog, ug Mutia niadtong Hulyo 31, 2025.
Gipanghimatuud sa DSWD nga ang ₱15,000 Cash Assistance Grant (CAG) nga gihatag niadtong 2024 sa mga benepisyaryo sa Pantawid Pamilyang Pilipino Program (4Ps) kay epektibong nagamit isip puhunan alang sa pagsugod o pagpalapad sa ilang mga proyekto sa panginabuhian.
Ang mga benepisyaryo nga napili nga gitawag og “low hanging fruits” o kadtong mga pamilya nga hapit na makaangkon sa ekonomikanhong kaugalingon ang gipili nga tagaan sa hinabang pinaagi sa ESSI tungod kay kini sila ang adunay potensyal nga makaabot dayon sa kalig-on pinaagi sa gamay apan tinud-anay nga suporta.
Gawas sa pagmonitor, ang mga personahe sa DSWD mitanyag usab og teknikal nga giya ug mga estratehiya sa pagpanguma, pagpamaligya, ug uban pang negosyo aron mas masustener ug mapalambo pa ang ilang mga kita.
Padayon ang DSWD sa pagbantay ug pagtubag sa panginahanglan sa mga benepisyaryo isip kabahin sa ilang paningkamot nga mapausbaw ang kalidad sa kinabuhi sa mga kabus, bulnerable, ug marginalized nga sektor sa katilingban.(Jumalisa Papa)
Source: DSWD Field Office IX- Zamboanga Peninsula