Malamposong gilusad dinhi sa dakbayan ang “Innovation, Science and Technology for Accelerating Regional Technology-Based Development (iSTART)” Information Caravan Hulyo 6, 2023 dinha sa Museo Dipolog.
Ang nasangpit nga kalihokan, gipasiugdahan sa rehiyonal nga buhatan sa Depatment of Science and Technology (DOST), duyog na sa presensiya sa mga opisyales niini gikan sa tulo (3) ka lalawigan sa rehiyon.
Sigun sa nasayran, nga kining maong programa ang gidesinyo uban sa katuyuan nga makahatag og proyekto ngadto sa mga nagkalain-laing sektor sa atong katilingban, lakip na ang mga kagamhanang lokal sa nasud.
Sumala pa nga kining maong programa maoy usa ka desinyo alang sa usa ka “strategic alignment” sa mga programa sa DOST nga nagtumong sa pagsuporta sa balanse nga paglambo pinaagi sa pagpadas-ug sa pangkalamboang rehiyonal pinaagi sa siyensiya, teknolohiya ug inobasyon.
Dinhi himoon ang paglambigit sa mga Researchers, Scientists ug Engineers (RSEs) kinsa magasuporta sa technology-based investments ug proyekto sa rehiyon pinaagi sa pagdani sa mga “technology-based investments subay sa balidong plano duyog sa pagtambayayong sa mga kagamhanang lokal.
Dugang nasayran nga ilawom ning maong programa, lima ka piniling LGUs dinhi sa rehiyon ang gitakdang makapahimulos niini nga gilangkoban sa lungsod sa Ipil ug Aurora, ug mga dakbayan sa Pagadian, Dipolog ug Dapitan.