Mihatag pundo ₱2,475,236 ang Department of Science and Technology Region IX (DOST-IX) sa Lokal nga Gobyerno sa Piñan, aron ipatuman ang Community Empowerment thru Science and Technology o CEST Project.
Atol sa pormal nga turnover ug inception meeting, mipirma sa kasabutan si Mayor Rommel I. Gudmalin uban ang mga opisyal sa LGU ug mga representante sa Provincial Science and Technology Office–Zamboanga del Norte (PSTO-ZDN).
Ang maong pondo gamiton sa tulo ka aspeto: Livelihood Enhancement- isip pagpalambo sa produksiyon sa buko juice aron makahatag ug dugang kita sa mga mag-uuma, ikaduha ang Environmental Protection– alang sa paggamit sa glass pulverizer machine aron marecycle ang basiyo nga botelya ug mabuhat nga materyales para sa eco-friendly nga konstruksyon, ug ang para sa Education– alang sa pag-instalar sa Versatile Instrument System for Science Education and Research (VISSER) kits aron mapalambo ang pagtudlo ug kadasig sa mga estudyante sa STEM subjects.
Ang CEST usa ka programa sa DOST nga nagtumong sa malungtarong pagpalambo sa komunidad pinaagi sa siyensiya ug teknolohiya, ilabina sa aspeto sa panginabuhian, edukasyon, kalikupan, panglawas, ug disaster risk reduction.(Iken B. Gullem)
Source: DOST Regional Office No. IX