Nagkahiusa si gobernador Darel Dexter Uy ug Senate President Vicente “Tito” Sotto sa ilang panagtagbo sa kauluhan, aron hisgutan ang mga programa ug polisiya nga makatabang sa padayon nga pag-asenso sa Zamboanga del Norte, kaniadtong Oktubre 15, 2025.
Sa ilang panagsabot, gisuportahan ni SP Sotto ang tukmang pag-apod sa National Tax Allotment (NTA) para sa probinsya, aron masiguro nga adunay igo nga pondo alang sa mga proyekto ug serbisyo sa katawhan.
Gihisgutan usab nila ang “Benteng (₱20) Bigas” nga programa ni Presidente Ferdinand “Bongbong” Marcos Jr., nga nagtinguha nga mapalambu ang baratong bugas nga may kalidad alang sa mga pamilya.
Lakip sa ilang plano ang pag-download diretso sa LGUs sa pondo alang sa mga proyekto sa edukasyon, ug imprastruktura aron mapadali ang implementasyon ug malikayan ang kalangan ug korapsyon.
Matud pa ni Gov. Uy, “Ang among panagtagbo dili alang sa personal nga interes, kundili para sa kaayohan ug kalamboan sa katawhan sa Zamboanga del Norte.”
Ang ilang panaghiusa nagpakita sa tinud-anay nga kooperasyon tali sa lokal ug nasudnong liderato, usa ka lakang nga nagpadayag sa tinguha nga magtinabangay alang sa tinuod nga kausaban ug kalamboan sa probinsya.(Iken B. Gullem)
Photo courtesy: Zamboanga del Norte Provincial News Network