Aron mapalapdan ang oportunidad sa trabaho ug serbisyo sa mga hilit nga komunidad, gipalig-on sa Department of Labor and Employment (DOLE) Region IX ang pagpatuman sa Trabaho Agad pinaagi sa usa ka TUPAD Convergence Project alang sa 401 ka benepisyaryo sa Zamboanga del Norte.
Nagpahigayon ang DOLE Zamboanga del Norte Field Office og Convergence Meeting niadtong milabay nga adlaw uban sa Department of Social Welfare and Development (DSWD), Technical Education and Skills Development Authority (TESDA), Xavier Agricultural Extension Service Foundation, Inc. (XAESFI), ug Local Government Unit sa Liloy aron hisgutan ang hiniusang implementasyon sa proyekto.
Ang inisyatiba gitumong alang sa mga benepisyaryo sa Geographically Isolated and Disadvantaged Areas (GIDA), lakip ang mga komunidad nga kulang o wala pa maabti sa nagkadaiyang serbisyo sa gobyerno. Gawas sa temporaryong pang-emergency nga trabaho pinaagi sa TUPAD, maglakip usab kini og skills training, competency assessment, climate change adaptation, ug mga programa sa pagpalig-on sa kalig-on sa komunidad.
Matod ni Zamboanga del Norte Field Office Head Elamsalih E. Ungad, pinaagi sa panagtambayayong sa nagkalain-laing ahensya, mas masiguro nga ang mga benepisyaryo dili lamang makadawat og dayong kita kondili usab makabaton og dugang kahibalo ug kahigayonan alang sa malungtarong panginabuhian.
Gilauman nga ipatuman ang proyekto gikan sa Hulyo hangtod Agosto 2026 isip kabahin sa padayon nga paningkamot sa DOLE sa paghatag og hiniusang serbisyo ug mas daghang oportunidad sa trabaho alang sa mga komunidad sa Zamboanga del Norte.(IKEN B. GULLEM)
Source: DOLE Liloy Satellite Office