Misalmot ug mitabyag ug serbisyo ang kawani gikan sa Department of Health – Zamboanga Peninsula Center for Health Development (DOH-ZP CHD) sa lig-on nga pakigtambayayong sa Department of Labor and Employment (DOLE), atol sa Ika-124 nga Kasaulogan sa Labor Day, kaniadtong Mayo 1,2026.
Ang maong kalihokan nagtanyag ug usa ka komprehensibo nga pakete sa importanteng serbisyo sa panglawas ngadto sa mga mamumuo ug miyembro sa komunidad nga gilangkuban sa Ipil, Zamboanga Sibugay, Pagadian City, Zamboanga del Sur, Dipolog City, Zamboanga del Norte ug Zambonga City.
Pinaagi sa pagpaduol niini nga mga serbisyo ngadto sa mga komunidad, ang inisyatiba wala lamang nagsaulog sa mga kontribusyon sa mga trabahante apan nagpalig-on usab sa mga paningkamot sa preventive healthcare sa rehiyon.
Tungod niini ,gipakatap atol sa selebrasyon ang mga medical team alang sa paghatag ug accessible ug libreng serbisyo sa pag-atiman sa panglawas nga gitumong sa pagpalambo sa kaayohan sa mga trabahanteng Pilipino.
Lakip sa mga serbisyo niini maong ang blood pressure assessment, medikal nga konsultasyon, random blood sugar testing, blood typing services, nutrition counseling, ug HIV testing and counseling.
Ang hiniusang paningkamot ug pasalig sa DOLE ug DOH nagpakita sa pagpanalipod sa kahimsog sa matag trabahante, usa ka pag-ila nga ang usa ka himsog nga sektor sa pamuo hinungdanon sa nasudnon nga produktibidad nga adunay kalamboan.(MEDALYN U. BORJA)
Source: DOH Zamboanga Peninsula CHD