Isip pag-ila sa talagsaong kalampusan ug inspirasyon nga gihatag sa kabatan-onan, gipasidunggan ni Dipolog city Mayor Roberto Y. Uy si Jordan P. Elico, nga nagtungha sa Zamboanga State College of Marine Sciences and Technology (ZSCMST), nga nakasulod isip Top 9 placer sa Fisheries Professional Licensure Examination, atol sa iyang courtesy visit sa City Mayor’s Office kagahapong adlawa, Oktubre 23, 2025.
Gidayeg ni mayor Uy si Elico tungod sa iyang kaisog, determinasyon, ug maayong ehemplo nga naghatag dungog sa Dakbayan sa Dipolog. Samtang, gihatagan usab siya ug incentive gikan sa city government isip pag-ila sa iyang kalampusan nga nagpakita sa potensyal ug abilidad sa kabatan-onan sa syudad.
Matud pa ni Mayor Uy, si Elico usa ka inspirasyon sa mga kabatan-onan ug timaan nga pinaagi sa pagpaningkamot ug pagtuo sa kaugalingon, makab-ot ang kalampusan bisan sa unsang lugar gikan.
Ang maong pasidungog usa ka pamaagi sa lokal nga pangagamhanan sa pagdasig sa mga estudyante nga magpadayon sa pagkab-ot sa ilang mga damgo ug paghatag dungog sa Dipolog City pinaagi sa edukasyon ug pag-alagad sa katawhan.
Atol sa pag bisita giubanan si Elico sa iyang amahan nga si Alejandro N. Elico Sr, residente sa Purok Corales, Barangay Olingan, Dipolog City, nga mipakita suporta ug garbo sa iyang anak.(Iken B. Gullem)
photo courtesy: Dipolog City Government