Mipaabot sa ilang dakong pagpasalamat ang rehiyonal nga buhatan sa Department of the Interior and Local Government (DILG) sa rehiyon 9 ngadto ni Governor Rosalina “Nanay Nene” Jalosjos sa pag-host sa ika-33 ka tuig nga pagsaulog sa Local Government Code Month nga gipasiugdahan sa probinsyal nga buhatan sa DILG, Oktubre 2 nga gipahigayon sa Zamboanga del Norte Convention and Sports Center.
Kini ang gipaabot ni Mr. Dave Barrot, LGOO VII, Local Government Monitoring and Evaluation Division, DILG 9, kinsa nag-representar ni Engr. Carmelo Enrique Libot, CESO IV, Assistant Regional Director sa DILG 9 isip maoy pinasidunggang mamumulong sa maong kalihukan.
Dugang ni Mr. Darrot nga ang maong selebrasyon dungan kining gihimo sa tibuok nasud diin adunay nagkalain-laing kalihukan ang nakahan-ay.
Si Mr. Darrot namahayag nga tumong sa pagsaulog sa Local Government Code Month mao ang paghatag ug gibug-aton sa mga paningkamot sa Local Government Units (LGUs).
Samtang si Atty Ivan Patrick Ang, spokesperson ug maoy nagrepresentar ni Governor Rosalina “Nanay Nene” Jalosjos ang nagkanayon sa iyang mensahe nga gikalipay niya ang pagsaulog sa maong kalihukan sanglit makahatag kini ug gahum sa LGUs ilabi na sa paghatud sa nanag-unang serbisyo alang sa katawhan.
Nasayran nga ang Republic Act 7160 o ang Local Government Code of 1991 ang nagpirmahan nga nahimong balaud kaniadtong Oktobre 10, 1991. Niini, matag bulan sa Oktobre kada tuig, gideklarar kini nga Local Government Month, matag ikaduha ka semana mao ang Local Government Week ug ang matag Oktobre 10 isip Local Government Day pinasikad sa Presidential Proclamation 63, series of 1992 nga pinetsahan sa Oktobre 2, 1992.
Karong tuiga, ang pagsaulog sa Local Government Code Month nagdala sa tema “Going SMART: Shaping Sustainable and Innovative Local Government Units” diin usa ka bulan nga gipahinungod aron sa pagsaulog sa good local governance nga nagbulok sa kalampusan ug kontribusyon sa local governments, pag-promote sa public welfare; pagpalambo sa pagtinabangay tali sa LGUs diin usa ka mahinungdanong lakang alang kauswagan ug kaayuhan sa komunidad.
Samtang si Provincial Director Oliver Ombos sa probinsyal nga buhatan sa DILG ang mipaabot usab sa iyang pagpasalamat sa kagamhanang probinsyal sa Zamboanga del Norte sa pagpangulo ni Governor Jalosjos.
Ang maong kalihukan gitambungan usab kini ni LTCOL Jimmy Sanz, Batallion Commander sa 97th IB, City and Muncipal DILG Officers, stakeholders ug uban pa.
(Source: Sheng Jumalon Bala – Provincial Information Center)