Mi-isyu ang DILG Region 9 og advisory aron pasabton ang tanang LGU sa Zamboanga Peninsula bahin sa pagpangilad sa grupo nga “12 Stars Sunflower Holding Corporation.” Ang pahibalo pinirmahan ni Assistant Regional Director Engr. Carmelo Enrique B. Libot.
Gipasabot sa DILG nga ang grupo pinangulohan ni Princess Jonah A. Seneca ug nagpadala kuno og komunikasyon sa lain-laing ahensya sa gobyerno aron mangayo og dako nga kantidad sa kwarta para sa mga proyektong ilang giangkon, lakip ang Maharlika Investment Fund. Nadiskobrehan usab nga nagpakaaron-ingnon silang kauban sa “Federal Tribal Government of the Philippines,” nga dili rekognisado sa NCIP, ug naggamit og ngalan sa lehitimong financial institutions aron mangalap og pondo.
Gipahibalo sa Bangko Sentral ng Pilipinas ug Top Bank Philippines, Inc. nga walay bisan unsang relasyon ang 12 Stars Sunflower Holding Corporation kanila. Gimandoan karon ang tanang LGU sa rehiyon sa pagsangyaw sa pahibalo ug pagmonitor aron maprotektahan ang publiko batok sa pagpangilad.(JENIFFER JR. DELICA)
Source: Dipolog City Government