Gidasig sa Department of Environment and Natural Resources o DENR Region IX ang mga batan-ong lider sa pagpalambo sa liderato, volunteerism, ug pag-atiman sa kinaiyahan atol sa ICAN Volunteers Congress 2026 nga gipahigayon sa Piñan, Zamboanga del Norte.
Isip representante ni Regional Executive Director Marie Angelique C. Go, gipasiugda ni Atty. Erwin W. Cabilin ang importante nga papel sa kabatan-onan sa pagtukod og lig-on nga komunidad ug sa pagpalambo sa malungtarong kalamboan pinaagi sa aktibong partisipasyon sa mga programa alang sa kalikupan.
Nahimong kabahin usab sa kalihokan ang usa ka interactive dialogue diin gipangutana sa mga delegado ang mga programa sa DENR, liderato, ug pag-apil sa mga kalihokan sa komunidad. Gitubag ni Atty. Cabilin ug Development Management Officer II Hearty A. Bundaog ang mga pangutana ug gipaila ang mga oportunidad alang sa kabatan-onan sulod sa ahensya.
Pinaagi sa maong kongreso, gipalig-on ang panagtambayayong sa DENR ug sa kabatan-onan aron mapadasig ang volunteerism, pagpanalipod sa kinaiyahan, ug aktibong partisipasyon sa pagpalambo sa malungtarong komunidad.(JENIFFER JR. DELICA)
Source: DENR Zamboanga Peninsula