Gipasig-uli sa Department of Agrarian Reform (DAR) Zamboanga del Norte ang panaghiusa sa mga agrarian communities sa Tampilisan pinaagi sa mediation aron malinawon nga masulbad ang mga panaglalis sa yuta.
Ubos sa pagpangulo ni PARPO II Daisy Dell Suan Digamon, gipadayon sa DAR-ZN ang community-based mediation nga nagtigom sa mga mag-uuma, landowners, ug stakeholders aron hisgutan ug masulbad ang mga isyu pinaagi sa dayalogo imbes nga panagbangi.
Sa Tampilisan, gipangulohan ni MARPO Peter Paul R. Cajocon, uban nila ARPO II Ewald S. Ordinaria ug mga personnel sa DAR Municipal Office, ang serye sa mga mediation ug conflict-resolution meetings.
Lakip sa mga isyu nga ilang gitutokan ang nagkasapaw nga boundaries sa yuta ug ang kalainan tali sa technical descriptions sa mga titulo ug sa aktuwal nga pag-uma sa mga parsela. Pinaagi sa relocation surveys, gisuta pag-usab ang hustong mga utlanan, samtang gihimo usab ang inclusion o exclusion proceedings aron matul-id ang records sa mga Agrarian Reform Beneficiaries (ARBs).(IKEN B. GULLEM)
Source: DAR Zamboanga del Norte Province