Gilauman nga mas mapalapad ang mga serbisyo ug programa alang sa mga mag-uuma ug Agrarian Reform Beneficiaries (ARBs) human maghiusa ang Department of Agrarian Reform (DAR) ug ubang ahensya sa gobyerno aron palig-onon ang paghatag og suporta sa sektor sa agrikultura.
Gipasiugda sa tigom sa Provincial Agrarian Reform Coordinating Committee (PARCCOM) ang pagtinabangay sa mga ahensya sama sa TESDA, NIA, DOLE, DTI, ug NCIP aron masiguro nga maabot sa mga benepisyaryo ang mga programa sa panginabuhian, pagbansay, irigasyon, pagpalambo sa produkto, ug uban pang serbisyo nga makatabang sa pagdugang sa ilang kita ug produksyon.
Lakip usab sa gihisgutan ang pagpaspas sa pag-apod-apod ug pagparehistro sa mga yutang agraryo pinaagi sa SPLIT Project ug ubang programa sa DAR.
Tumong sa maong paningkamot nga mapalig-on ang seguridad sa pagpanag-iya sa yuta ug masiguro nga makabenepisyo ang mga mag-uuma sa mga oportunidad nga gitanyag sa gobyerno.(IKEN B. GULLEM)
Source: DAR Zamboanga del Norte Province