Nagpadayon ang Department of Agrarian Reform (DAR) Zamboanga del Norte sa pagpalig-on sa pagproseso sa land titles ug survey documents aron mapaspasan ang paghatag og yutang adunay legal nga titulo ngadto sa mga benepisyaryo sa agrarian reform program sa probinsya.
Gipangunahan ni Provincial Agrarian Reform Program Officer II Daisy Dell Suan Digamon ang partisipasyon sa DAR Zamboanga del Norte sa usa ka consultative meeting sa Pagadian City uban sa ubang opisyal sa DAR ug Department of Environment and Natural Resources (DENR) Region IX Surveys and Mapping Division.
Sentro sa gihisgutan ang pagpalig-on sa implementasyon sa Land Administration and Management System – Inspection, Verification, and Approval of Surveys (LAMS-IVAS) ug ang Support to Parcelization of Lands for Individual Titling (SPLIT) Project nga nagtumong sa mas paspas nga pagproseso sa survey ug paghatag og indibidwal nga titulo sa yuta ngadto sa mga agrarian reform beneficiaries.
Sumala sa DAR Zamboanga del Norte, ang maong panagtigom makatabang aron mapadali ang pag-apruba sa mga dokumento ug masiguro nga mas daghang mag-uuma sa probinsya ang makabaton og seguradong pagpanag-iya sa yuta.
Miapil usab sa maong kalihukan sila CARPO-LTID Teodulo J. Yanoyan Jr., SARPO Engr. Rocel C. Acevedo, ug Engineer II Engr. Roger John A. Tamala nga mitabang sa teknikal nga diskusyon alang sa epektibong implementasyon sa programa.(IKEN B. GULLEM)
Source: DAR Zamboanga del Norte Province