Gipahigayon sa Department of Agrarian Reform o DAR Zamboanga del Norte ang provincial recalibration sa mga target sa DAR-SPLIT Project alang sa ikaduhang semestre sa 2026 aron mapalig-on ang pagpatuman sa mga programa alang sa mga benepisyaryo sa agrarian reform.
Sa maong kalihokan nga gipangunahan ni Provincial Agrarian Reform Program Officer II Daisy Dell Suan Digamon sa Dipolog City, gisusi sa mga opisyal ug kawani sa DAR ang nahimo sa unang semestre, giila ang mga hagit sa implementasyon, ug girepaso ang mga target sa land tenure, agrarian justice ug support services aron mapaspasan ang paghatag og serbisyo sa mga mag-uuma.
Gitambongan usab kini ni Officer-in-Charge Regional Director Engr. Jena C. Salaug ug sa mga Municipal Agrarian Reform Program Officers, diin ilang gihisgutan ang pagpalig-on sa koordinasyon sa ubang ahensya, regular nga field monitoring ug mas episyenteng pagpatuman sa mga proyekto sa umaabot nga mga bulan.
Sumala sa DAR, ang maong recalibration nagtumong sa pagpalig-on sa implementasyon sa DAR-SPLIT Project aron mas daghang agrarian reform beneficiaries ang makadawat og hapsay ug tukmang serbisyo sa tibuok Zamboanga del Norte.(JENIFFER JR. DELICA)
Source: DAR Zamboanga del Norte