Nagtinabangay ang Department of Agrarian Reform (DAR) ug Department of Environment and Natural Resources (DENR) sa pagpahigayon og ground verification ug validation sa mga yutang giatiman sa Agrarian Reform Beneficiaries of Marcelo Cooperative (ARBEMCO) sa Barangay Marcelo ug Barangay Tugop, Kalawit.
Kini nga hiniusang kalihokan gipangulohan sa DAR Zamboanga del Norte ubos sa pagpanguna ni Provincial Agrarian Reform Program Officer II Daisy Dell Suan Digamon, pinaagi sa Kalawit Municipal Agrarian Reform Office nga gidumala ni MARPO Peter Paul R. Cajocon, uban sa DENR Regional Office–Land Management Services (LMS) nga gipangulohan ni Engr. Ronilo Saguin.
Tumong sa joint verification ang pagsiguro nga husto ug tukma ang dokumentasyon sa mga yutang sakop sa ARBEMCO isip kabahin sa mga kinahanglanon alang sa land documentation. Ang resulta sa validation isumite sa Surveys and Mapping Division (SMD) aron mapadali ang pag-apruba sa survey returns ug masiguro nga ang mga yuta natala ug namapa subay sa mga teknikal nga sumbanan.
Miapil usab sa kalihokan ang mga opisyal sa ARBEMCO nga gipangulohan ni Chairman Julie Hermano, nga nagpakita sa ilang suporta sa proseso sa pagpalig-on sa land documentation ug pagsunod sa mga polisiya sa agrarian reform.
Kini nga pagtinabangay, gipalig-on sa DAR ug DENR ang ilang koordinasyon aron masiguro ang hapsay nga pagdumala sa dokumentasyon sa yuta ug mapalambo ang seguridad sa pagpanag-iya sa mga agrarian reform beneficiaries sa Zamboanga del Norte.(IKEN B. GULLEM)
Source: DAR Zamboanga del Norte Province