Mokabat sa 254 ka Dapitanon ang makabenepisyo sa temporaryong panginabuhian ubos sa Tulong Panghanapbuhay para sa Ating Disadvantaged/Displaced Workers (TUPAD) human sa orientation nga gipahigayon sa Local Government Unit (LGU) of Dapitan ug Department of Labor and Employment (DOLE) niadtong Agosto 6 sa Government Center Lobby.
Ang TUPAD usa ka programa sa DOLE nga nagtumong sa paghatag og temporaryong trabaho ug dugang nga kita sa mga displaced ug disadvantaged workers pinaagi sa community-based employment.
Gipangulohan sa Public Employment Service Office (PESO), ubos ni PESO Manager Nonito A. Malacat, ang rehistrasyon sa mga benepisyaryo, samtang gipasiugdahan nila Joan M. Jaranay ug Lady Rose E. Alia, mga TUPAD Coordinators, ang orientation aron ipasabut ang mga buluhaton, responsibilidad, ug mga lagda sa programa sa dili pa ang ilang deployment.
Sa kinatibuk-an, 195 ka benepisyaryo ang magserbisyo sulod sa 20 ka adlaw, samtang 59 ka benepisyaryo ang magtrabaho sulod sa 45 ka adlaw. Ang tanang benepisyaryo gikatakdang mosugod sa ilang community work sa Agosto 10, 2026.
Pinaagi sa maong programa, nagpadayon ang paningkamot sa LGU Dapitan ug DOLE sa paghatag og dugang nga oportunidad sa panginabuhian samtang gipalig-on ang partisipasyon sa mga benepisyaryo sa mga kalihokan nga makahatag og kaayohan sa komunidad.(IKEN B. GULLEM)
Source: Dapitan City Government