Nagtinabangay ang mga empleyado sa City Government ug mga residente sa usa ka Coastal Clean-Up Drive nga gipahigayon sa baybayon sa Sunset Boulevard, Dapitan City sayo sa buntag, Hulyo 12, 2025.
Ang maong kalihokan kabahin sa pagpangandam alang sa umaabot nga pista sa lungsod ug tumong usab nga mapreserbar ang kahinlo ug kaanindot sa baybayon nga paboritong destinasyon sa mga turista ug lokal.
Gipangunahan kini sa City Environment and Natural Resources Office (CENRO) uban sa nagkadaiyang departamento sa lokal nga panggamhanan ug mga volunteer nga buot motabang sa paglimpyo sa basura nga nangadipara sa baybayon.
Dako ang pasalamat sa CENRO Head nga si Engr. Maria Lopez sa mga Dapitanon nga nitambong ug nagpakita sa suporta alang sa kalikupan. Giingon niya nga ang maong kalihokan dili lang pagpangandam para sa pista, apan usa usab ka paagi aron mapakita nga kitang tanan adunay dakong responsibilidad sa pagpanalipod sa atong kinaiyahan.
Gikuha usab sa maong kalihokan ang oportunidad aron pahimangnoan ang publiko sa kahinungdanon sa pagsegregate sa basura ug paglikay sa paglabay og hugaw sa kadagatan.
Human sa kalihokan, giplano pa sa CENRO ug City Tourism Office ang dugang nga environmental activities alang sa bulan sa pista aron mas mapadako pa ang partisipasyon sa komunidad.(Jumalisa Papa)
Source: Dapitan City Government