Gipangulohan sa Dapitan Tourism Office ang Initial Coordination Meeting alang sa proposed Dapitan Dive Spots Development niadtong Agosto 22, 2026 sa Dapitan City Hall, isip unang lakang sa pag-assess ug pagplano sa potensyal nga mga dive destination sa siyudad.
Ubos sa pagpanguna ni Jervie Q. Padrones, Officer-in-Charge sa Dapitan Tourism Office, mitambong sa panagtigom ang mga key stakeholders lakip ang Bustling Organization of Young Aqualads o BOYA, DIVE Dapitan o ANIMA, ug mga tourism officers. Gituki sa mga partisipante ang Tag-Ulo, Banbanan, Baylimango ug Guimputlan isip mga lugar nga mahimong susihon alang sa umaabot nga pagpalambo sa diving tourism.
Gihisgutan usab ang panginahanglan sa skills development ug capacity building, scientific research ug assessment, tukmang imprastraktura, pag-andam ug partisipasyon sa komunidad, livelihood opportunities, ug pagpanalipod sa marine resources. Gipunting nga ang pagpalambo sa mga dive spots kinahanglan ibase sa siyentipikong datos, lokal nga kahibalo, responsableng turismo ug pag-amuma sa kinaiyahan.
Ubos sa administrasyon ni Mayor Evelyn T. Uy, padayon nga gipalig-on sa City Government of Dapitan ang panagtambayayong sa mga diver, barangay, lokal nga komunidad ug mga concerned organizations aron mapalambo ang marine tourism potential sa siyudad. Ang maong initial coordination mitumong sa paglatid sa direksyon alang sa responsableng ug malungtarong pagdumala sa mga dive spots, samtang gipreserbar ang mga kahinguhaan sa kadagatan alang sa umaabot nga mga henerasyon.(JENIFFER JR. DELICA)
Source: Dapitan City Government