Nasungkit sa Dakbayan sa Dapitan ang Best Audio-Visual Presentation (AVP) award pinaagi sa presentasyon nga nagpasundayag sa istorya ni Maria Uray ug sa “reef-to-ridge” nga konsepto nga naghulagway sa kadagaya sa kultura, kasaysayan, ug natural nga bahandi sa siyudad.
Pinaagi sa pagrepresentar ni Queen Andrea Cuesta Parson, napadayag sa AVP ang Dapitan dili lamang isip usa ka destinasyon kondili usa ka dakbayan nga puno sa mabuhi nga mga sugilanon nga napanday sa kasaysayan, kabilin, ug kusganong papel sa kababayen-an sa komunidad.
Gipasidunggan usab ang paningkamot sa tibuok production team nga nagtinabangay gikan sa pagplano hangtod sa paghimo sa maong presentasyon. Gipasalamatan si Mayor Evelyn “Belen” T. Uy, City Administrator Danilo “Dan” Areños Jr., ang J Visuals Team, H Visuals Team, ug uban pang mga katuwang nga nakatampo sa kalampusan sa proyekto.
Matud pa ang maong kadaugan nagpamatuod sa abilidad sa Dapitan sa pagpaambit sa iyang talagsaong sugilanon pinaagi sa mamugnaong pamaagi ug epektibong pag-asoy sa iyang identidad isip usa ka dakbayan nga dato sa kultura ug kasaysayan.
Ang Best AVP award usa ka dungog dili lamang alang kang Queen Andrea kondili alang usab sa tibuok Dapitan nga nagpadayon sa pagpaila sa iyang kabilin ug katahum sa tibuok probinsya.(IKEN B. GULLEM)
Source: Discover Dapitan