Hustong nutrisyon ug pag-atiman sa kalikupan ubos sa temang “Nutrisyon at Kalikasan, Ating Pangalagaan!” maoy gipasiugda atol sa pagsugod sa City Government of Dapitan, pinaagi sa City Nutrition Division, ang pagsaulog sa ika-52 nga Nutrition Month niadtong Hulyo 2 sa Government Center Lobby.
Gipangunahan ni City Mayor Evelyn “Belen” T. Uy ang programa uban ni Vice Mayor Gabriel M. Cad, City Councilor Ian Francis J. Adasa, OIC-City Nutrition Action Officer Ma. Leizel C. Balagapo, City Agriculturist Cyril A. Patangan, mga Barangay Nutrition Scholars (BNS), mga magtutudlo, partner agencies, ug uban pang mga sektor nga nagkahiusa sa pagpalambo sa kahimsog sa komunidad.
Sa mensahe ni Mayor Uy, gidayeg niini ang dedikasyon sa mga Barangay Nutrition Scholars sa paghatag og serbisyo aron mapalambo ang kahimtang sa nutrisyon sa matag Dapitanon.
Kabahin sa pagsugod sa selebrasyon ang pagpanghatag og init ug masustansiyang pagkaon ngadto sa mga buntis ug mga batang nag-edad og tulo hangtod lima ka tuig, pinaagi sa panagtambayayong sa Dapitan City Government Employees Association Multi-Purpose Cooperative (DCGEAMPC).
Gipanghatagan usab ang mga pamilya og organic vegetable seedlings ug abono sa City Agriculture Office aron madasig ang backyard gardening ug lig-on nga suplay sa pagkaon sa panimalay.
Naglakip usab ang kickoff sa nagkadaiyang kompetisyon sama sa Nutri-Quiz, Fruit and Vegetable Display Contest, Best Backyard o Gulayan sa Barangay Contest, ug Cooking Contest, nga nagtumong sa pagdasig sa hustong nutrisyon, food security ug paggamit sa lokal nga mga produkto.(IKEN B. GULLEM)
Source: Dapitan City Government