Gisusi ug gitin-aw sa City Government of Dapitan ug mga kaabag nga ahensya ang katapusang preparasyon alang sa Kinabayo 2026 atol sa All-Event Coordination Meeting nga gipahigayon niadtong Hulyo 2 sa Government Center Amphitheater.
Gipangulohan nila OIC-City Administrator Danilo S. Areños Jr. ug Jervie Padrones ang miting nga gitambongan sa mga department heads, focal persons, event organizers, ug mga representante sa nagkalainlaing ahensya aron masinabtan ang mga buluhaton sa matag opisina atol sa selebrasyon nga ipahigayon gikan Hulyo 10 hangtod 25.
Lakip sa mga gihisgutan ang security deployment, traffic management, logistical arrangements, ug koordinasyon sa matag kalihokan aron masiguro ang hapsay ug organisadong pagdumala sa pista.
Mipasalig usab si Zamboanga del Norte Police Provincial Office Provincial Director PCol. Reydante E. Ariza nga adunay igo nga kapolisan nga ideploy ug ipatuman ang mga lakang sa pagmintinar sa kalinaw ug kahusay sa tibuok selebrasyon.
Gipresentar usab ang traffic management plan sa siyudad aron maandam ang pagdagsa sa mga bisita ug masiguro ang hapsay nga dagan sa trapiko atol sa Kinabayo 2026.(IKEN B. GULLEM)
Source: Dapitan City Government