Dakpan ang usa ka sakop sa Philippine Coast Guard (PCG) human naaktuhan nga namaligya sa smuggled nga sigarilyo didto sa lungsod sa Salug, Zamboanga del Norte, sa mga nakalabayng adlaw.
Si Provincial Director PCOL Rainier Diaz sa Zamboanga del Norte Police Provincial Office, mibutyag sa pangalan sa suspek nga si PO2 Alnasheed Sarail Mohammad, 44 anyos, residente sa Lumiyap, Divisoria, Zamboanga City.
Nasikop ang suspek sa pinaagi sa mga personahe sa RMU 9 Tracker Team ug Zamboanga del Norte Maritime Police Station,diin naaktuhan nga namaligya ug mga kahon sa “New Berlin” smuggled nga sigarilyo nga gikataho kining usa ka illegal nga nakalusot.
Nakuha sa possession ngadto sa suspek ang 200 ka ream sa New Berlin nga sigarilyo nga mobalor og 229,200 ka pesos ug usa ka unit sa Toyota Vios (dark brown) nga adunay plate number nga KAR 7655 nga maoy gisakyan sa dinakpang suspek.
Sa pagkakaron ang suspetsado mag atubang na sa kasong paglapas sa Republic Act 10863 o ang “Customs Modernization and Tariff Act” ug RA 10643 o ang Graphic Health Warnings on Tobacco Products.
Matud pa sa PNP nga sa kanunay hugtan nilang ipatuman ang mga kampanya batok sa smuggling sa rehiyon. Sila gaawhag sa publiko sa pagpahibalo o pakigkoordenar kanila kun unsa man gani ang mamatikdan nga dili maayo nga kalihokan aron mapadayun ang kalinaw ug hapsay nga kumonidad. (Angelica T. Obina)