Nagpahigayon ang City Government sa Dipolog pinaagi sa City Social Welfare and Development Office og technical assistance ug seminar bahin sa Domestic Administrative Adoption ug Foster Care Program aron mapalig-on ang suporta sa mga kabataan ug pamilya sa komunidad.
Gipahigayon ang kalihokan niadtong Mayo 7, 2026 didto sa Museo Dipolog diin mitambong ang mga social welfare personnel ug stakeholders aron mapalawom ang ilang kahibalo kabahin sa proseso sa adoption ug foster care.
Gipasiugda sa mga resource speakers ang kaimportante sa paghatag og luwas, maampingon ug mahigugmaong panimalay alang sa mga kabataang nanginahanglan og pag-atiman ug proteksyon.
Sumala sa CSWDO, kabahin kini sa padayong paningkamot sa siyudad sa pagpanalipod sa kabataan, pagdasig sa responsableng pagginikanan ug pagpalig-on sa suporta alang sa mga pamilyang nanginahanglan.(JENIFFER JR. DELICA)
Source: Dipolog City Government