Nagpahigayon ug usa ka courtesy call si Department of Agriculture (DA) OIC Regional Executive Director Vener L. Dilig ug iyang kaubang opisyal kang Governor Darel Dexter T. Uy, aron hisgutan ang mga programa sa agrikultura ug ang umaabot nga pagbisita ni DA Secretary Francisco Tiu Laurel Jr. sa probinsya karong umaabot Nobyembre 28, nga i-uyon sa paglunsad sa “KUyog Ta sa Tag P20 nga Bugas” program sa Kapitolyo.
Gipahibalo ni Gov. Uy nga giplano nilang dad-on si Secretary Laurel sa Dapitan Port, Galas Port, ug sa Provincial Agricultural and Industrial Center (PAIC) aron makita niini ang dagkong potensyal sa pagpondo sa dugang proyekto. Gipresentar usab ni Engr. Kerr Porlas ang DA Portal alang sa pagsumite sa existing ug proposed farm-to-market roads (FMRs) nga gamiton sa DA isip basihan sa pagpundo.
Gibutyag ni RED Dilig nga ang DA karon adunay ₱32 bilyones nga pondo, human madugangan ang orihinal nga budget sa ahensya. Gidetalye usab ang suplay sa palay sa probinsya, diin 95% niini kontrolado sa pribadong sektor, samtang 5% lamang ang magarantiyahan sa gobyerno. Pinaagi sa Rice for All Program ug sa pinalapad nga purchasing power sa NFA, target sa gobyerno ang pagpalit ug palay sa ₱17–₱23/kg alang sa wet palay ug ₱23–₱30/kg alang sa dried palay.
Gilauman ni Gov. Uy nga ang programa sa P20 nga bugas makahatag ug dako nga kaayohan, sama sa mas preskong bugas sa NFA, mas taas nga presyo para sa mga mag-uuma, ug mas baratong bugas para sa katawhan. Ang panagtagbo nagsilbing lakang sa pagpalig-on sa koordinasyon tali sa DA ug Kapitolyo aron mapaayo ang sektor sa agrikultura sa Zamboanga del Norte.(IKEN B. GULLEM)
Source: Zamboanga del Norte Provincial News Network