Gipunting sa Commission on Audit (COA) ug sa City Government of Dapitan ang mga rekomendasyon ug obserbasyon gikan sa miaging audit atol sa Exit Conference nga gihimo sa SP Session Hall alang sa Calendar Year 2025 audit results.
Ang maong conference wala lamang naghisgot sa kasamtangang audit findings kondili usab sa kahimtang sa implementasyon sa mga rekomendasyon nga gibilin sa miaging mga audit aron mas mapalambo ang internal control ug pagdumala sa pondo sa syudad.
Mitambong sa tigom sila si Mayor Evelyn Uy, Vice Mayor Hon. Gabriel Cad, OIC City Administrator Danilo S. Areños Jr., mga department heads, ug mga representante sa nagkadaiyang opisina sa lokal nga kagamhanan.
Matod ni Mayor Uy, committed ang city government sa pagsunod sa mga rekomendasyon sa COA ilabina sa pagpatuman sa sakto nga proseso sa disbursement ug financial management aron masiguro ang limpyo ug transparent nga paggamit sa pondo publiko.
Samtang, giila ni Mathew Rey M. Magno ang kooperasyon sa mga opisina sa syudad nga nakatabang aron mahuman sa hapsay ang audit process ug mapalig-on ang mandato sa COA.
Dugang pa niya, importante ang Exit Conference aron matimbang pag-ayo ang audit observations ug makahatag og giya sa mga opisina sa gobyerno alang sa mas epektibong serbisyo ug mas maayong pagdumala sa resources.
Natapos ang conference uban sa paningkamot sa duha ka panig nga ipadayon ang panagtinabangay alang sa mas lig-on nga accountability ug transparency sa serbisyo publiko sa Dapitan City.(IKEN B. GULLEM)
Source: Dapitan City Government