Gisugdan na dinhi sa dakbayan ang pagpamakuha kontra COVID-19 sa mga kabataang Dipolognon nga dunay comorbidity nga nag-edad gikan 12 hangtod 17 anyos kaganinang buntag, Oktubre 29, ning tuiga.
Kini ang nasayran human gipahigayon ang kick-off ceremony sa Pediatric COVID-19 Vaccination didto sa Corazon C. Aquino Hospital (CCAH) nga nahimutang sa Brgy. Biasong ning siyudad.
Dugang nasayran nga kining mga edara nga dunay comorbidity parte usab sa Priority Group nga A3 diin pinasikad sa DOH (Department of Health) guidelines, kinahanglan nga dunay pagtugot gikan sa ginikanan ug sa bata ayha pa kini bakunahan, kinahanglang dunay igong suplay sa Pfizer ug Moderna tungod kay kini lamang ang duha ka klase sa bakuna ang gitugutan sa Food and Drug Administration nga gamiton alang ning nasangpit nga age bracket og pinaka-importante, nga dunay clearance o medical certificate gikan sa doctor sa bata nga dunay sakit nga siya pwede nga bakunahan.
Kini ang gikompirmar usab ni Dr. Benson Panaguiton, Doctor to the Barrio, nga dunay igong suplay sa Pfizer ug Moderna ang CCAH ug Zamboanga del Norte Medical Center (ZNMC), samtang sumala usab ni Mr. Larry Padilla, CCAH Supervising Administrative Officer, nga kon gamay ra ang mga batang dunay comorbidity ang magpabakuna karong adlawa, modawat ang CCAH og mga walk-in tungod kay tumong sa gobyerno nga mabakunahan ang tanan aron adunay proteksiyon batok sa COVID-19 virus.
Subay niini, gi-awhag ang mga ginikanan nga dunay mga comorbid nga mga anak ubos sa nahisgotang mga pangidaron sa unahan nga mo-koordinar lamang sa mga personahe sa CCAH ug ZNMC alang sa pagpabakuna sa ilang mga anak, kon gusto nila.
(Source: Dipolog City Government Facebook page)