Nagmalampuson ang gipahigayon nga “Contract Signing” alang sa mga nurses ug “medical technologists” kon “med techs” sa Corazon C. Aquino Hospital (CCAH), Oktobre 28, ning tuiga didto sa Corazon C. Aquino Hospital, Brgy. Biasong, ning dakbayan nga nagsugod sa may alas-1:30 sa hapon.
Subay sa nasangpit nga kontrata, mokabat sa P22,000.00 ka pesos matag bulan ang madawat sa matag nurse o medtech nga nagtrabaho sa CCAH sulod sa unom (6) ka bulan ug mamahimong ma-renew. Namugna ang maong kontrata aron sa pagsukli sa kahago, sakripisyo ug maayong pagserbisyo sa mga narses ug “medtechs” ngadto sa mga katawhan ilabina sa panahon sa pandemya.
Mitambong sa maong “contract signing” sila si Chief of Hospital, Dr. Jesse D. Tiu, kinsa mihatag sa iyang hamubong mensahe kabahin sa tumong sa maong kalihokan, Hospital Administrator, Dr. Michael G. Te, Chief Nurse, Ms. Clarissa J. Darcera, OIC – Human Resource Management and Development Officer, Ms. Charmie A. Yu ug City Legal Officer, Atty. Poe F. Bagarinao Jr., alang sa dugang pagpasabot ngadto sa mga narses ug “med techs” kalabot sa unod sa maong kontrata.
Sa kinatibuk-an, mikabat sa dise sais (16) ka mga medtech ug tranta’y nuwebe (39) ka mga nurses ang mipirma sa maong kontrata.
Source: DIPOLOG CITY GOVERNMENT Facebook page