Nangayo og klarong tubag si 3rd District Rep. Ian Amatong sa Department of Environment and Natural Resources (DENR) kabahin sa mining activities nga giplano sa Gutalac, Zamboanga del Norte, tungod sa kabalaka sa posibleng dugayng epekto niini sa komunidad ug kinaiyahan.
Atol sa briefing sa House Committee on Appropriations alang sa proposed 2027 budget sa DENR niadtong Agosto 26, gipangutana ni Amatong kung giunsa pag-abot sa punto nga ang usa ka mining company nakapangayo og mining rights nga naglangkob sa dakong bahin sa lungsod.
Alang sa kongresista, dili igo nga maaprubahan o maproseso ang usa ka mining application. Kinahanglan una nga masusi pag-ayo ang posible nga epekto niini sa mga residente, kinaiyahan, ug kaugmaon sa maong lugar.
Gipahayag usab ni Amatong ang iyang pagkadismaya sa iyang naunang pakig-istorya sa DENR Region IX, ilabina sa iyang giingong kakulang sa klaro ug makatagbaw nga tubag sa mga pangutana kabahin sa mining situation sa Gutalac.
“Natatakot ako, pati yung mga constituent ko, Kung ano ang kahihinatnan ng mining sa area namin”, matud niya samtang gipasiugda ang iyang responsibilidad isip representante sa mga molupyo sa distrito.
Gipahinumdoman usab niya ang DENR nga apil sa pangunang responsibilidad sa ahensya ang pagpanalipod sa kalikupan ug pagsiguro nga ang mga proyekto nga adunay dakong epekto sa komunidad moagi sa husto ug hugot nga pagsusi.
Para kang Amatong, ang pag-uswag dili angay mahimong hinungdan aron ikompromiso ang kinaiyahan ug ang kaugmaon sa mga molupyo sa Third District sa Zamboanga del Norte.(IKEN B. GULLEM)
Source: Team Adrian Amatong