Gipadayon sa Provincial Government of Zamboanga del Norte (PGZN) ang pagpaayo sa Bucana–Riconalla Barangay Road pinaagi sa sectional grading works aron mapalig-on ang konektibidad ug mapadali ang adlaw-adlaw nga paglihok sa mga residente sa Siocon.
Ang road rehabilitation nagtutok sa mga bahin sa karsada nga nanginahanglan og pagpatag ug pagpaayo tungod sa kadaot nga dala sa kanunay nga paggamit ug kondisyon sa panahon.
Gilauman nga ang mas maayong kahimtang sa dalan makapahapsay sa pagbiyahe sa mga motorista ug residente, ilabina sa mga nagsalig niini nga ruta sa pag-adto sa ilang trabaho, negosyo, umahan, ug uban pang destinasyon.
Dako usab ang papel sa maayong road access sa pagdala sa mga produkto sa agrikultura ngadto sa mga merkado. Pinaagi sa mas hapsay nga biyahe, mahimong maminusan ang kalisod ug kalangan sa transportasyon sa mga mag-uuma ug negosyante sa lugar.
Sumala sa Office of the Provincial Engineer (OPE), ang maong maintenance ug rehabilitation kabahin sa padayong paningkamot sa probinsya nga mapadayon sa maayong kondisyon ang provincial road network ug masiguro ang luwas nga paggamit niini.
Gipatuman ang proyekto ubos sa pagdumala ni Engr. Dennis de Guzman sa Office of the Provincial Engineer District III-C sa Siocon, nga maoy responsable sa pagsiguro nga ang mga buluhaton masunod sa gikinahanglang teknikal nga sumbanan.
Padayon usab nga giprioridad sa PGZN ang pagmintinar ug pagpaayo sa mga dalan isip kabahin sa pagpalig-on sa konektibidad, transportasyon, ug pag-uswag sa mga komunidad sa nagkalain-laing bahin sa lalawigan.(IKEN B. GULLEM)
Source: Zamboanga del Norte Provincial News Network