Nahimong sentro sa katapusang hugna sa Information Caravan 2025 ang Dakbayan sa Dipolog nga gipasiugdahan sa Department of Agriculture (DA) ubos sa temang “Agrikultura para sa Masaganang Bagong Pilipinas”, kaniadtong Oktubre 23, 2025.
Kapin 600 ka mga mag-uuma, mananagat, kooperatiba, ug lokal nga mga opisyales ang mitambong sa maong kalihokan nga nagtumong sa pagpalig-on sa kahibalo ug kapasidad sa sektor sa agrikultura pinaagi sa paghatud sa mga programa ug serbisyo sa gobyerno ngadto sa komunidad.
Lakip sa mga gipanghisgutan sa caravan mao ang High-Value Crops Development Program, National Corn Program, National Rice Program, Disaster Risk Reduction and Management, Financial Mechanisms, Marketing Assistance, ug uban pa. Gipaambit usab sa Bureau of Fisheries and Aquatic Resources (BFAR) ang pinakabag-ong mga programa alang sa mga mananagat.
Ang Dipolog City maoy ikaupat nga syudad sa Mindanao ug katapusang lugar nga giadtuan sa caravan human sa Calamba City, Maasin City, Malaybalay, Dumaguete, ug Pampanga.
Sa maong kalihokan, gibug-atan sa DA ang importansya sa panaghiusa ug inobasyon aron makab-ot ang tinguha sa Masaganang Bagong Pilipinas. Gidasig usab ang mga mag-uuma ug mananagat nga mugamit sa modernong teknolohiya, clustering, ug pag-apil sa mga programa sa gobyerno alang sa padayong kalamboan sa agrikultura.
Pinaagi niini, gipakita sa DA ang padayon nga suporta sa mga lokal nga mag-uuma ug mananagat aron mamahimong produktibo, lig-on, ug inobatibo ang agrikultura sa rehiyon ug sa tibuok nasud.(Iken B. Gullem)
Photo courtesy: via Department of Agriculture ZAMPEN