Labing 450 ka mag-uuma gikan sa mga lungsod sa Siayan ug Sindangan ang nakadawat ug family food packs ilawom sa Project Lawa at Binhi sa Department of Social Welfare and Development (DSWD) uban sa Provincial Government of Zamboanga del Norte, kaniadtong Oktubre 23, 2025.
Ang ayuda, nga gibahin sa 16 ka barangay sa Siayan, adunay sulod nga unom ka kilo nga bugas, napulo ka delata, kape, ug chocolate drink. Samtang, sa Sindangan, 150 ka mag-uuma usab ang nakadawat sa maong ayuda.
Ang Project Lawa at Binhi, pinaagi sa DSWD ug sa Provincial Agriculturist’s Office, kabahin sa Risk Resiliency Program-Climate Change Adaptation and Mitigation nga nagahatag prioridad sa mga mag-uuma nga naapektuhan sa pagbag-o sa klima.
Sumala ni Governor Uy, kini nga inisyatibo usa lamang sa daghang programa nga gilaraw sa probinsya aron masuportahan ang mga mag-uuma ug mapalambo ang sektor sa agrikultura. Gipahibalo usab sa gobernador nga padayon ang implementasyon sa Enhanced Gasang Bahandianon sa Umahan (EGBU) ug gilauman nga mopalit na ang probinsya sa bugas gikan sa mga lokal nga mag-uuma sa tag ₱20 matag kilo.
Matud usab ni Acting Provincial Agriculturist Armie Bergado, ang food packs nagpasabot dili lang ug tabang pinansyal apan usa usab ka pagpasidungog sa mga mag-uuma nga aktibong misalmot sa Cash for Work Program.
Kini nga kalihokan, gipangulohan ni DSWD Project Development Officer III Jeffrey Toribio, ubos sa direktiba ni Secretary Rex Gatchalian, nga ang mga benepisyaryo nga nagkinahanglan tabang alang sa padayong pag-uma dapat hatagan gilayon.
Samtang si Siayan Mayor Ali Bongcawel ug Sindangan Vice Mayor Nilo Sy nagpahayag sa ilang pasalamat sa DSWD ug sa probinsyal nga gobyerno sa padayon nga pag-atiman sa mga mag-uuma ug sa paghatag og mga programa nga makatabang sa ilang panginabuhian.(Iken B. Gullem)