Nanglimpyo ang City Government of Dapitan pinaagi sa Public Services Division sa City Environment and Natural Resources Office (CENRO), aron tangtangon ang natipong basura sa gawas sa historical ug cultural landmark, ang Museo Rizal Dapitan.
Tumong sa kalihokan ang pagsulbad sa nagkadaghan nga basura nga nahimong klarong hulga sa kahapsay ug katahum sa palibot sa museyo, ug gidali nga gilihok sa CENRO aron maibalik ang kalimpyo ug maampingan ang dignidad sa maong heritage site.
Gipangulohan ang kalihokan ni Engr. Jeffrey Lasola ubos sa pagdumala ni George T. Olario Jr., isip kabahin sa regular ug padayon nga public service operations sa division. Aktibong nanarbaho ang mga personahe sa pagtangtang sa basura ug pagsiguro sa husto nga pagdumala niini.
Samtang, padayon gihapon ang City Government of Dapitan sa pagpalig-on sa sanitation ug environmental services, ilabi na sa mga lugar nga daghan og bisita, aron mapanalipdan ang mga public spaces ug mapreserbar ang historical identity sa siyudad.(IKEN B. GULLEM)
Source: City Government of Dapitan