Gibisita sa Department of Agrarian Reform (DAR) Zamboanga del Norte ang kahimtang ug pagpatuman sa proyekto sa chicken–egg production sa usa ka organisasyon sa mga benepisyaryo sa repormang agraryo sa lungsod sa Siocon.
Gisusi ni Provincial Agrarian Reform Program Officer II Daisy Dell Suan Digamon uban si Provincial Agrarian Reform Program Officer I Engr. Alfonso A. Tan, ang S. Cabral Agrarian Reform Beneficiaries Association aron personal nga masubay ang implementasyon sa proyekto ubos sa Climate-Resilient Farm Productivity Support Project (CRFPSP).
Atol sa monitoring visit, gisusi sa mga opisyal ang operational status sa proyekto lakip na ang kahimtang sa poultry cages, feeding systems, housing, ug ang panglawas sa mga andam na mangitlog nga himungaan. Tumong sa maong lakang ang pagsiguro nga husto ang paggamit sa mga ekipo, feeds, ug teknikal nga kahibalo nga gihatag sa programa.
Sumala sa DAR, ang proyekto parehas sa standard egg-layering initiatives nga naghatag og kompleto nga suporta, gikan sa materyales hangtod sa training aron masiguro ang dugayng produktibidad sa mga mag-uuma.
Pinaagi niini, gipalig-on ang kapasidad sa mga agrarian reform beneficiaries sa pag-atubang sa epekto sa climate change samtang ginapausbaw ang ilang produksyon ug kita.(IKEN B. GULLEM)
Source: DAR Zambonorte