Gikalipay ni Ilocos Sur 1st District Representative ug Senatorial Candidate Luis “Manong Chavit” Singson ang paghidangat niya dinhi sa Zamboanga del Norte kagahapong adlawa, Desyembre 13.
Sa Press Conference nga gipahigayon sa Provincial Guest House uban sa pamilyang Jalosjos, Turno ning dakbayan sa Dipolog gipaila ni Manong Chavit ang kalabot sa VBank, usa ka digital flatform nga nagtinguha alang sa paghatag ug sayon nga pag-access sa mga serbisyo sa pinansyal ang mga Pilipino nga walay banko ug limitado sa pag-access niini.
Ang VBank usa ka application sa cellphone aron mapasayon ang mga transaksyon sa pinansyal, maghatag og micro-loans, ug maghatag og luwas nga kapilian sa paghipos sa kwarta alang sa milyon-milyong Pilipino nga wala maapil sa sistema sa bangko.
Diha-diha dayon, adunay napulo ka sakop sa local media ug indibidwal kinsa unang naka-download sa maong VBank app ang nabalhinan sa tag P10,000.
Ingon man lain nga gilaraw ni Manong Chavit mao ang pagpautang sa mga katawhan ug Electric CAR diin makuha kini nga walay interest, isip tabang usab para sa katawhang Pilipino.
Kung mapili unya pagka-senador si Manong Chavit hatagan niya ug dakong prioridad ang probinsya sa Zamboanga del Norte gumikan sa ilang kasuod ni Former Congressman Nonong Jalosjos.
Si Manong Chavit nahidangat dinhi sa Dipolog Airport sa may alas 9 ang takna sa buntag kagahapon lulan sa iyang pribadong eroplano uban ni Dapitan City Mayor Seth Frederick “Bullet” Jalosjos.
Milahos kini sa kapitolyo ug giabi-abi sa mga kawani ug lahos sa buhatan ni Governor Rosalina “Nanay Nene” Jalosjos alang sa pag-courtesy call sa gobernador.
Human niini, milahos kini sa Provincial Guest House alang na sa press conference uban sa mga sakop sa local and national media.
Mitambong usab sa press conference sila si Former 3rd District Congressman Cesar Jalosjos, Dapitan City Mayor Bullet Jalosjos ug Pinan Mayor Cecilia Jalosjos Carreon. (Angelica T. Obina)
(Source: PIC-Sheng Jumalon Bala)