Patay ang 24-anyos nga si Rosemarie Pasaporte, residente sa Barangay Cantao-an, Naga City, Cebu, human dunggaba sa iyang 32-anyos nga kaipon nga si Mario Gabayan.
Ang insidente nahitabo pasado alas 3 sa hapon, Disyembre 15, 2024, sa Purok 6 Apostle, Barangay Cantao-an, dakbayan sa Naga.
Base sa imbestigasyon sa kapulisan, ang duha nagkuyog sa Christmas party sa ilang anak, bisan kapin sa pito na ka buwan na silang panagbuwag. Pagkahuman sa party, naglalis ang duha sa ilang balay hangtod nga gihimo ang pagpanunggab.
Si Pasaporte gihatod dayon sa Vicente Mendiola Medical Center apan gideklara nga dead on arrival tungod sa mga samad dinunggaban. Ang suspek daling nisibat ug kasamtangan nga gipangita sa kapulisan pinaagi sa hot pursuit operation.
Sa pagkakaron padayon ang imbestigasyon sa kapulisan aron mahibal-an ang dugang detalye sa motibo sa maong krimin. (Renante Socia Lada)