Ang buhatan sa City Civil Registrar (CCR) ning dakbayan sa Dipolog ang mipasi-ugda sa Barangay Civil Registry Seminar Nobyembre 4 ning tuiga.
Ang tumong ning nasangpit nga kalihukan, mao nga matabangan kadtong mga lumulupyo ning dakbayan kinsa wala pa makapa-rehistro sa ilang live birth certificate, marriage certificate ug uban pang mga importanteng dokyumento, nga ma-rehistro na sa CCR pinaagi sa koordinasyon Barangay Local Government Unit (BLGU).
Si Ms. Rosemarie P. Miranda, City Civil Registrar, kinsa pormal nga nagbukas sa maong pagbansay-bansay ang mipasabot nga kining maong kalihukan gipahigayon aron ma-alagaran ang katawhan dinhi sa dakbayan ug ma-solusyonan ang mga babag ug rason nga dili makapa-rehistro ang katawhan. Gibutyag usab niini nga base sa ilang records, daghan pa gayod ang wala ma-rehistro ilabina kadtong toa nanimuyo sa mga lagyong dapit ug pinaagi sa koordinasyon sa mga barangay, makalugway ang gobyerno sa maayong serbisyo ngadto sa katawhan.
Mitambong usab si Bise-mayor Atty. Senen O. Angeles, diin sa iyang hamubong mensahe, iyang gisaysay kon unsa ka-importante ang pagpa-rehistro tungod kay sumala niya, ang mga dokyumento gikinahanglan gayod alang sa bisan unsang transaksiyon. Nanghinaot ang bise-mayor nga ang nasangpit nga pagbansay-bansay makadugang sa kahibalo sa mga opisyales sa barangay ug makatabang alang sa kalamboan sa kagamhanan.
(Source: Dipolog City Government Facebook page)
