Ang kagamhanang lokal sa Dipolog pinaagi sa City Health Office (CHO) ang malampusong mipahigayon sa “Buntis Congress 2023” Septiyembre 29 ning tuiga.
Ilawom sa tema nga “Pagsulong Tungo sa Malusog at Ligtas na Pagdadalantao,” tumong ning nasangpit nga kalihukan nga mas mapalapdan pa ang kaalam sa mga mabdos kabahin na sa prenatal care, breastfeeding, reproductive health ug family planning.
Si Mayor Darel Dexter T. Uy kinsa mitambong usab sa nasangpit nga kalihukan ang mihatag og mensahe diin gipadayag niini nga ang pagmabdos maoy usa ka blessing gikan sa Ginoo ug angayan kining ipasalamat ngadto sa Labawng Makagagahum.
Dugang niini nga isip mga ginikanan, kinahanglan nga pangga-on ug giyahan ang ilang mga anak alang sa mas malamboon nga kaugmaon ug usab ipatigbabaw ang panaghi-usa ug pagtibangay aron mas mahimo pang “livable” ug “lovable” ang dakbayan sa Dipolog.
Ang mga lectures nga gipahigayon ang naglangkob sa prenatal care diin si Dr. Katherine Demerin (Maternal Health) ang mipahigayon, samtang si Mr. Vince Ronan G. Sagrado (Maternal Nutrition) ang mituki usab sa mga angayang buhaton aron magpabilin nga himsog ang kondisyon sa inahan ug sa bata nga anaa sa sabakan niini.
Lakip sa mihatag ug mensahe sa nasangpit nga Buntis Congress mao sila si City Health Officer, Dr. Rowel J. Mata ug CHO Nurse Supervisor, Ms. Donabelle V. Mutia.
Nahimong masadyaon ang maong aktibidad tungod usab sa gipahigayon nga Gandang Buntis 2023 Contest ug Buntis Got Talent samtang duna usa’y mga Buntis Kits ang gipanghatag ngadto sa mga partisipantes.
(Source: Dipolog City Government Facebook page)