Cagayan de Oro – SINGKWENTAY OTSO (58) ka magtiayon ang gikasal ni Mayor Klarex Uy atol sa mass wedding nga gi-organisar sa mga third year students sa kursong Bachelor of Science in Hospitality Management sa PHINMA – Cagayan de Oro College, Septiyembre 29, adlaw’ng Biyernes, diha sa Limketkai Event Center, ning siyudad.
Atol sa kasal, gipahinumduman ni Mayor Klarex Uy ang bili sa pagsinabtanay sa usa’g-usa isip magtiayon.
“Ang panag-ipon ug panagkuyog wala’y undang sa pagsabot sa matag usa bisan pa’g pila ka tuig namo nag-ipon, tagaan mo sa Ginoo og taas na panag-uban.. wala’y undang sa pagsabot sa matag usa sa tagsa-tagsa ka kinaiya ug batasan,” pasabot sa mayor.
Ang maong kasal final requirement sa mga estudyante sa ilang subject nga gitawag og TOU083 kon Introduction to Meeting, Incentives, Conferences and Exhibitions.
Kini kabahin sa ‘EXPO KASALING KASALAN 2023’ nga gi-organisar sa PHINMA- COC Department of Hospitality and Tourism Management diin gisalmotan sa nagkadaiyang wedding suppliers sa siyudad ug rehiyon.
Tinguha usab niini nga mahatagan sa oportunidad nga ma-showcase ang nagkadaiyang negosyo ug produkto sa mga wedding suppliers ug matabangan nga makasal ang mga ‘underprivileged’ couples.
Gawas sa kasal, libreng souvenirs ug reception usab ang natagamtaman sa mga bag-ong kasal nga gipaluyohan sa Philippine Statistics Authority X, Limketkai Center, City Civil Registry, City Mayor’s Office ug Community Improvement Division.
Written by Cheleste Simene
Photo by Cheleste Simene