Mas napalig-on ang kahandam sa Sindangan District Hospital sa paghatag og serbisyong medikal human madawat niadtong milabay nga adlaw ang bag-ong bulto sa hospital supplies, medisina ug oxygen.
Gidawat sa mga doktor, nurse ug ubang healthcare workers ang mga suplay nga makatabang sa pagpadayon sa hapsay nga operasyon sa ospital ug sa pag-atiman sa mga pasyente gikan sa Sindangan ug kasikbit nga mga lungsod.
Lakip sa mga nadawat ang regular nga suplay sa oxygen, nga gilauman makapadali sa paghatag og respiratory support ug makapamenos sa kalisod sa mga pasyente ug ilang mga pamilya sa pagpangita niini panahon sa emerhensiya.
Sumala sa Provincial Government of Zamboanga del Norte, ang maong delivery kabahin sa paningkamot sa administrasyon ni Governor Darel Dexter T. Uy sa pagsiguro nga adunay igo nga medisina, kagamitan ug uban pang gikinahanglan sa adlaw-adlaw nga operasyon sa mga district hospital.
Kini nga lakang gilauman nga mas daghang residente sa ikaduhang distrito ang makadawat og mas paspas, hapsay ug dekalidad nga serbisyong panglawas.(IKEN B. GULLEM)
Source: Zamboanga del Norte Provincial News Network